نعت
یا رحمۃ للعالمیں
یا رحمۃ للعالمیں
الہام جامہ ہے ترا
قرآں عمامہ ہے ترا
منبر ترا عرش بریں
یا رحمۃ للعالمیں
آئینہ رحمت بدن ، سانسیں چراغ فکر و فن
قرب الہی تیرا گھر ، الفقر فخری تیرا دھن
خوشبو تری جوئے کرم
آنکھیں تری بابِ حرم
نور ازل تیری جبیں
یارحمۃ للعالمیں
تری خموشی بھی اذاں نیندیں بھی تیری رتجگے
تیری حیات پاک کا ہر لمحہ پیغمبر لگے
خیر البشر رتبہ ترا
آواز حق خطبہ ترا
آفاق تیرے سامعیں
یارحمۃ للعالمیں
قبضہ تری پرچھائیں کا بینائی پر ادراک پر
پیروں کی جنبش خاک پر اور آہٹیں افلاک پر
گردِ سفر تاروں کی ضو
مرکب براق تیز رو
سائیس جبریل امیں
یارحمۃ للعالمیں
تو آفتابِ غار بھی ، تو پرچم یلغار بھی
عجز و وفا بھی ، پیار بھی ، شہ زور بھی سالار بھی
تیری زرہ فتح و ظفر
صدق و وفا تیری سپر
تیغ و تبر صبر و یقیں
یا رحمۃ للعالمیں
پھر گڈریوں کو لعل دے ، جاں پتھروں میں ڈال دے
حاوی ہوں مستقبل پہ ہم ، ماضی سا ہم کو حال دے
دعوی ہے تیری چاہ کا
اس امتِ گمراہ کا
تیرے سوا کوئی نہیں
یارحمۃ للعالمیں
Comments
Post a Comment